നനുത്ത മണ്ണിന്‍റെ മണവും മച്ചിന്‍ പുറത്ത് ചിതറി വീഴുന്ന ആലിപ്പഴങ്ങളുടെ നാദവുമായ് മഴ ഇപ്പോഴും പെയ്യ്തിറങ്ങുകയാണ് ഓര്‍മ്മകളുടെ അകത്തളങ്ങളില്‍.......
മധുമഴ പൊഴിയുന്ന നേരത്ത്
നീയെന്നരികില്‍ ഇരുന്നെങ്കില്‍
നെറുകില്‍ തഴുകിയെങ്കില്‍
നിദ്ര വന്നെന്നെ പുല്‍കും വരെ
ഒരു താരാട്ട് പാട്ടായി നീ മാറിയെങ്കില്‍....
ആദ്യാനുരാഗമായി
അറിയാത്തൊരീണമായി നീ
പെയ്ത് നിറയുമ്പോള്‍ നിനക്കായെന്നും
ഞാന്‍ ഉണര്‍ന്നിരിയ്ക്കാം
ഞാനെന്ന ഭൂമിയെ നീ
ആവേശത്തോടെ പ്രണയിക്കുമ്പോള്‍
ആ സ്നേഹം ഞാന്‍ നെഞ്ചോട്
ചേര്‍ത്ത് വെയ്ക്കാം....
നിന്റെ തലോടലില്‍ കുളിരണിയുമ്പോൾ
നീ തന്ന നൊമ്പരം മറന്നിടാം ഞാന്‍
നിന്റെ സ്നേഹാര്‍ദ്ര മഴഗീതം
ശ്രീരാഗമായ് കാതില്‍ നിറയുമെങ്കില്‍
ആവോളം ഞാന്‍ ആസ്വദിച്ചീടാം.....
ഓരോ മഴയും ഓരോ ഓര്‍മ്മകളാണ്
നീ തന്ന സ്നേഹവും നൊമ്പരങ്ങളുമാണ്
ഓരോ തുള്ളിയിലും നീ എനിക്കായ്
കരുതി വെച്ച നിന്റെ ഹൃദയതുടിപ്പുകളാണ്
പെയ്ത് തോരാതെ നിറഞ്ഞു നില്‍ക്കുന്ന
നിന്റെ പ്രണയമാണ്.....
ഓരോ മാത്ര വന്ന് നീ മായുമ്പോഴും
ഒരു വേഴാമ്പലിനെ പോലെ
ഞാന്‍ കാത്തിരിക്കാം
നീ വീണ്ടും മഴമേഘമായി
വന്നെന്നെ തഴുകുമെങ്കില്‍.....
No comments:
Post a Comment